ភ្នំពេញ៖ នាយករដ្ឋមន្ត្រីកម្ពុជាសម្ដេចធិបតី ហ៊ុន ម៉ាណែត បានថ្លែងដោយរំលឹកទៅកាន់មន្ត្រីនៃក្រសួងមហាផ្ទៃឲ្យក្រឡេកមើលនឹកស្រមៃអំពីអនាគតរបស់កូននិងចៅរបស់ពួកគេ។ ការថ្លែងឲ្យនឹករលឹកអំពីអនាគតរបស់កូនចៅបែបនេះគឺដោយសម្ដេចបានបង្ហាញពីក្ដីបារម្ភទាក់ទងជាមួយនឹងបញ្ហាគ្រឿងញៀនដែលកំពុងកើតមាននៅក្នុងប្រទេស។

ថ្លែងនៅក្នុងពិធីបិទសន្និបាតត្រួតពិនិត្យលទ្ធផលការងារឆ្នាំ២០២៣ របស់ក្រសួងមហាផ្ទៃនៅរសៀលថ្ងៃទី២៩ ខែកុម្ភៈ ឆ្នាំ២០២៤ សម្ដេចធិបតី ហ៊ុន ម៉ាណែត ថា បញ្ហាគ្រឿងញៀន គឺជាបញ្ហារួមសង្គម

ហើយវានឹងប៉ះពាល់មិនថាមួយកូនរាស្ត្រ ឬកូនមន្ត្រីនោះឡើយ ដោយសម្ដេចជំរុញទៅដល់មន្ត្រីគ្រប់រូបជាពិសេសអាជ្ញាធរមានសមត្ថកិច្ចក្នុងការមានវិធានការតឹងរឹងក្នុងការលុបបំបាត់គ្រឿងញៀនចេញពីប្រទេស។

សម្ដេចធិបតីបានលើកឡើងឧទាហរណ៍នៃប្រទេសមួយចំនួនដែលស្ថានភាពនៃបញ្ហាគ្រឿងញៀននៅប្រទេសទាំងស្ទើរតែពុំអាចគ្រប់គ្រងបាន ដែលបង្កឲ្យមានបញ្ហាអសន្តិសុខនៅក្នុងសង្គមជាច្រើន។

សម្ដេចថាការលុបបំបាត់បញ្ហាគ្រឿងញៀននៅក្នុងប្រទេសកម្ពុជាគឺត្រូវតែមានវិធានការក្ដៅ ហើយមិនត្រូវវែកចកនោះទេ ដោយត្រូវតែទប់ស្កាត់ឲ្យខានតែបាន ហើយនិងមិនត្រូវឲ្យវាកើតឡើងវិញម្ដងទៀតនោះទេ៕